விவசாயிகளுக்கு உரங்களுடன் சேர்த்து இணை பொருட்களை கட்டாயப்படுத்தி வழங்கக்கூடாது என விருதுநகர் கலெக்டர் எச்சரிக்கை.
உரங்களுடன் இணை பொருட்களை விவசாயிகளுக்கு கட்டாயப்படுத்தி வழங்கினால் கடும் நடவடிக்கை எடுக்கப்படும் என விருதுநகர் மாவட்ட ஆட்சித்தலைவர் ஜெ.மேகநாதரெட்டி எச்சரித்துள்ளார்.
விருதுநகர் மாவட்டத்தில் யூரியா 1991 மெட்ரிக் டன், டிஏபி 841 மெட்ரிக் டன், பொட்டாஷ் 574 மெட்ரிக் டன், காம்ப்ளக்ஸ் 2028 மெட்ரிக் டன் தனியார் மற்றும் கூட்டுறவு உர விற்பனை நிலையங்களில் இருப்பு வைக்கப்பட்டு, தற்போது விற்பனை செய்யப்பட்டு வருகிறது.
உரங்கள் அரசு விற்பனைக்கு நிர்ணயம் செய்த விலையிலேயே தற்போது விற்பனை செய்யப்பட்டு வருகிறது. உரங்கள் கூடுதல் விலைக்கு விற்றால் உரக்கட்டுப்பாட்டு சட்டப்படி கடும் நடவடிக்கை எடுக்கப்படும் எனவும், மானிய விலையில் பிஓஎஸ் இயந்திரங்கள் மூலமாக பயிர் சாகுபடிக்கு தேவையான உரங்களை விவசாயிகளின் ஆதார் எண்ணை பதிவு செய்து விற்க வேண்டும் எனவும், உரங்களின் இருப்பு மற்றும் விலை விபரங்களை தகவல் பலகையில் எழுதிட வேண்டும் எனவும், விவசாயிகள் உரங்கள் வாங்கும் போது உரிய இரசீது பெற வேண்டும் எனவும் அறிவுறுத்தப்பட்டுள்ளது.
மேலும் இருப்பு விபரங்கள் தனியார் உர விற்பனை நிலையங்கள் மற்றும் கூட்டுறவு உர விற்பனை நிலையங்களில் சரியாக பராமரிக்கப்பட வேண்டும் எனவும், உரங்களுடன் நேனோ யூரியா போன்ற இணை பொருட்களை விவசாயிகளுக்கு கட்டாயப்படுத்தி வழங்கக்கூடாது எனவும், உரிய ஆவணமின்றி உர விற்பனையில் ஈடுபட கூடாது எனவும், தவறும் பட்சத்தில் கடும் நடவடிக்கை எடுக்கப்படும் எனவும் மாவட்ட ஆட்சித்தலைவர் திரு.ஜெ.மேகநாதரெட்டி தெரிவித்துள்ளார்.
